கொரோனாவுக்கு பலியானோர் விகிதம், இதுவரை இல்லாத அளவுக்கு 2.23 சதவீதமாக குறைந்தது.
புதுடெல்லி,
கடந்த 24 மணி நேரத்தில், கொரோனாவில் இருந்து குணமடைந்து 35 ஆயிரத்து 286 பேர் ‘டிஸ்சார்ஜ்’ ஆகியுள்ளனர். தொடர்ந்து 6-வது நாளாக, நாள் ஒன்றுக்கு 30 ஆயிரத்துக்கும் மேற்பட்டோர் குணமடைந்து வருகிறார்கள்.
இத்துடன், இதுவரை கொரோனாவுக்கு குணமடைந்தவர்களின் மொத்த எண்ணிக்கை 9 லட்சத்து 88 ஆயிரத்து 29 ஆக உயர்ந்துள்ளது. அதாவது, இந்த எண்ணிக்கை வேகமாக 10 லட்சத்தை நெருங்கி வருகிறது.
இதன்மூலம், குணமடைந்தவர்கள் விகிதம் 64.51 சதவீதமாக அதிகரித்துள்ளது. இது, மற்றொரு சாதனை ஆகும். தற்போது, 5 லட்சத்து 9 ஆயிரத்து 447 பேர் மட்டுமே மருத்துவ கண்காணிப்பில் உள்ளனர்.
கொரோனாவுக்கு பலியானோர் விகிதம், 2.23 சதவீதமாக குறைந்துள்ளது. கடந்த ஏப்ரல் 1-ந் தேதியில் இருந்து இதுதான் மிகக்குறைவான அளவாகும்.
இதற்கு மத்திய, மாநில அரசுகளின் ஒருங்கிணைந்த வியூகமே காரணம் என்றும், தொடர்ந்து பலி விகிதம் குறைந்து வருவதாகவும் மத்திய சுகாதார அமைச்சகம் தெரிவித்துள்ளது.
